बुटीबोरीतील येथे विद्यार्थ्याची आत्महत्या सुसाईड नोटमध्ये लिहिले 'मम्मी-पप्पा मला माफ करा'

सुसाईड नोटमध्ये लिहिले 'मम्मी-पप्पा मला माफ करा'

बुटीबोरी (प्रतिनिधी) : वर्धमाननगर येथील १६ वर्षीय विद्यार्थ्याने रेल्वेखाली उडी घेऊन आत्महत्या केली. ही धक्कादायक घटना सोमवारी दुपारच्या सुमारास घडली. मंगेश दिनेश चौधरी (१६) असे मृत विद्यार्थ्याचे नाव आहे. प्राप्त माहितीनुसार, मूळचा वडगाव ता. तिरोडा, जि. गोंदिया येथील रहिवासी मंगेश चौधरी सेंट फ्लॉरेंट शाळेचा दहाव्या वर्गाचा विद्यार्थी होता. मंगेश सोमवार, २२ फेब्रुवारी रोजी दुपारी २ वाजता शाळेतून घरी परतला. यानंतर त्याने वडिलांना मोटारसायकलने इंडोरामा कंपनीमध्ये सोडून दिले. नंतर घरी न जाता त्याने घराजवळील बोरखेडी रेल्वेलाईनवर जाऊन रेल्वेखाली आत्महत्या केली. या घटनेची माहिती मिळताच रेल्वे पोलिसांनी बुटीबोरी पोलिसांना कळविले. दरम्यान, पोलिसांनी घटनास्थळाचा पंचनामा केला असता मंगेशच्या शरीराचे तुकडे-तुकडे झाले होते. त्याच्या खिशात एक सुसाईड नोट आढळून आली. यामध्ये त्याने इंग्रजीमध्ये 'मम्मी-पप्पा मला माफ करा, मी स्वत: जीव देत आहे', असे लिहिले होते. त्यामुळे त्याच्या आत्महत्येमागील नेमके कारण स्पष्ट होऊ शकले नाही. त्याच्या मृतदेहाचे मंगळवारी नागपूरच्या मेडिकल रुग्णालयात शवविच्छेदन करण्यात आले. पुढील तपास बुटीबोरी पोलीस करीत आहेत.