बुट्टीबोरीतील कामगार रुग्णांसाठी अत्याधुनिक रुग्णालय ? दोन वर्षांत मिळणार लाभ : पोही गावातील पाच एकर जागेवर होणार बांधकाम

बुट्टीबोरीतील कामगार रुग्णांसाठी अत्याधुनिक रुग्णालय

? दोन वर्षांत मिळणार लाभ : पोही गावातील पाच एकर जागेवर होणार बांधकाम

राज्य सरकारच्या प्रयत्नाने पोही येथे तयार होणार्‍या कामगार रुग्णालयाच्या बांधकामाला एप्रिल महिन्यात सुरुवात होणार आहे. दोन वर्षात रुग्णालय तयार होईल. बुट्टीबोरीतील कामगारांच्या उपचाराची तात्पुरती व्यवस्था करण्यासाठी विवेकानंद मिशन नावाच्या खाजगी रुग्णालयासोबत बोलणी सुरू आहे. लवकरच त्या हॉस्पिटलसोबत करार करण्यात येईल. - डॉ. मीना देशमुख, वैद्यकीय अधीक्षक, कामगार रुग्णालय सोमवारीपेठनागपूर: आशिया खंडातील सर्वात मोठी औद्योगिक वसाहत असलेल्या एमआयडीसीमध्ये काम करणारे कामगार आजारी असल्यास त्यांना जवळपास १५ किमी अंतर पार करून सोमवारीपेठ येथील हॉस्पिटलमध्ये उपचारासाठी यावे लागते. तर, बुट्टीबोरीमधील कामगार २५ किमीच्या अंतरावरून उपचारासाठी येतात. मात्र, आता एमआयडीसी आणि बुट्टीबोरीतील दीड लाख कामगारांसाठी खुशखबर आहे. शंकरनगरजवळ असलेल्या पोही गावातील ५ एकर जागेवर अत्याधुनिक कामगार रुग्णालय दोन वर्षांत तयार होणार आहे. यासाठी राज्य सरकारने ५ कोटी रुपये मंजूर केले आहे. सोमवारीपेठ रुग्णालयात आल्यास अंतर अधिक असल्याने कामगारांना पूर्ण दिवस सुटी घ्यावी लागते. त्यामुळे एमआयडीसी आणि बुट्टीबोरीतील कामगार रुग्ण खाजगी इस्पितळातच उपचार करणे पसंत करतात. शिवाय उपचाराच्या साधनांचा अभाव असल्याने अनेकदा मेडिकल किंवा मेयोमध्ये कामगार रुग्णांना पाठविले जाते. त्यामुळे उपचारासाठी येणार्‍या कामगारांना नाहक त्रास सहन करावा लागतो. अत्याधुनिक यंत्रसामुग्रीने सुसज्ज असे पोही गावात निर्माण होणारे कामगार रुग्णालय एमआयडीसी आणि बुट्टीबोरीतील कामगारांसाठी सोयीचे ठरणार आहे. पोही गावातील रुग्णालयात जाण्यासाठी बुट्टीबोरातील कामगारांना फक्त तीन कि.मी. अंतर जावे लागणार आहे. तर, एमआयडीसीतील कामगार रुग्णांसाठी पोही गावाचे अंतर दीड कि.मी. आहे. या हॉस्पिटलमध्ये छोट्यामोठय़ा सर्व शस्त्रक्रियेसह हृदयशस्त्रक्रियासुद्धा करण्याची सुविधा राहणार आहे. महत्त्वाची बाब म्हणजे सोमवारीपेठ येथील रुग्णालयावरील कामाचा ताण यामुळे कमी होईल. पोही गावातील पाच एकर जागेवर दोन वर्षांत अत्याधुनिक कामगार रुग्णालयाचे काम पूर्ण होणार आहे. राज्य सरकारने मंजूर केलेल्या निधीपैकी २ कोटींचा पहिला हप्ता पुढील महिन्यात रुग्णालयासाठी मिळणार असून उर्वरित दोन हप्ते क्रमाक्रमाने दोन वर्षांत दिले जाईल. त्यामध्ये रुग्णालयासाठी लागणारे साहित्य तसेच यंत्रसामुग्री खरेदी केली जाणार आहे.